Shoqëria civile dhe të rinjtë për zhvillim inkluziv dhe të qëndrueshëm përmes ekonomisë cirkulare në Maqedoninë e Veriut

Menaxhimi i mbeturinave në Maqedoninë e Veriut është veçanërisht shqetësues, me sfida të konsiderueshme mjedisore dhe shoqërore. Mbeturinat janë kontribuesi i dytë më i madh për emetimet e gazrave serrë në vend. Shkalla e riciklimit është shumë e ulët, vetëm 1%, në krahasim me mesataren e Bashkimit Evropian prej 44%. Më shumë se tre të katërtat e popullsisë nuk janë të njohur me konceptin e ekonomisë cirkulare, dhe vetëm 15% e bizneseve besojnë se modelet e tyre mund të përshtaten me këtë qasje më të qëndrueshme.

Kalimi në modelin e ekonomisë cirkulare është i domosdoshëm jo vetëm për të reduktuar emetimet e gazrave serrë, por edhe për t’u përshtatur me Agjendën e Gjelbër të Bashkimit Evropian për Ballkanin Perëndimor, Marrëveshjen e Gjelbër të BE-së dhe integrimin e Maqedonisë së Veriut në BE. Forcimi i kapaciteteve dhe qëndrueshmërisë së organizatave civile dhe të rinjtë e trajnuar dhe të angazhuar për të mbrojtur dhe zbatuar iniciativat për përgjegjësinë klimatike mund të ndihmojnë Maqedoninë e Veriut në realizimin e potencialit për një ekonomi cirkulare.

Qëllimet:
Kjo nismë synon të inkurajojë organizatat civile dhe të rinjtë të luajnë një rol më aktiv në kalimin e Maqedonisë së Veriut drejt një ekonomie të gjelbër dhe të qëndrueshme, duke u përshtatur me Marrëveshjen e Gjelbër Evropiane. Konkretisht, veprimi do të fokusohet në (1) forcimin e kapaciteteve dhe qëndrueshmërisë së të paktën 35 organizatave civile në fushën e ekonomisë cirkulare, (2) rritjen e ndërgjegjësimit dhe kuptimit të ekonomisë cirkulare dhe çështjeve të lidhura me mbetjet tek të rinjtë, duke mbështetur njëkohësisht mobilizimin e tyre dhe (3) promovimin e integrimit të temave të ekonomisë cirkulare në kurrikulën e shkollave të mesme profesionale.

Qasja:
Ky projekt do t’u sigurojë organizatave civile mjete për të nisur ose zhvilluar në mënyrë efektive modele inovative të ekonomisë rrethore, duke përfshirë nisma për bashkëpunim midis OJQ-ve, autoriteteve dhe komunitetit të biznesit. Projekti gjithashtu do të mbështesë financiarisht nisma për reduktimin e mbeturinave, ripërdorimin, riciklimin dhe përmirësimin, duke inkurajuar një ndryshim në sjellje. Me qasjen “të mësuarit nëpërmjet punës” në qendrat rinore dhe shkollat e mesme profesionale, liderët e qendrave rinore, të rinjtë, mësuesit dhe nxënësit do të kenë mundësinë të ndërtojnë kapacitete dhe të pajisen për të zbatuar nisma për ekonominë cirkulare dhe integrimin e praktikave të ekonomisë cirkulare në arsimin profesional.

Përmbledhje e projektit:
Projekti synon 12 organizata civile që veprojnë në fushën e ekonomisë cirkulare, 23 iniciativa civile me qendër jashtë Shkupit, 8 liderë të qendrave rinore, 160 të rinj që frekuentojnë qendrat rinore, 20 mësues nga shkollat e mesme profesionale të bujqësisë dhe tekstilit, dhe të paktën 400 nxënës nga këto shkolla. Ky projekt 30-mujor do të zbatohet në të tetë rajonet planifikuese të Maqedonisë së Veriut.