YouCanBe: обука за социјални и зелени претприемачи во Романија

Од 19-25 мај, во Букурешт, Романија, нашите проектни партнери Scoala De Valori беа домаќини на петдневна обука како дел од проектот YouCanBe. Оваа обука обедини млади претприемачи од Европа со цел да ги тестираат и усовршат алатките дизајнирани за мотивирани социјални и зелени претприемачи со чија помош и самите ги развиваа и унапредуваа нивните претприемачки идеи.

На обуката учествуваа млади претприемачи од Франција, Литванија, Романија и Хрватска, заедно со членовите на АРНО заедницата на социјални и зелени претприемачи, вклучувајќи ги Ангелина од BioHide (RISE Journey 4), Илија, млад банкар, Ристе, истражувач и посветен соработник на АРНО, и Никола, креативен и маркетинг ентузијаст. Надоврзувајќи се на спроведената евалуација од претходната обука одржана во Вилнус во март годинава, оваа обука обезбеди уште поголем квалитет за учесниците. Учесниците се вклучија во динамични работилници и дискусии, проширувајќи ги своите претприемачки вештини.

За дополнително да ги инспирира и мотивацира учесниците, програмата опфати посети на две иновативни социјални претпријатија во Романија: Atelierul de panza, познати по производството на ќеси за повеќекратна употреба од 100% нетретиран, необоен памук и други производи од пред-производствени текстилни материјали и Ateliere fara frontiere, водени од мотото „Веруваме во луѓето“, кои вработуваат тешко вработливи луѓе и ги вклучуваат во работилници како што се Educlick за рециклирање електрична и електронска опрема и Remesh за трансформирање на рекламните банери и мрежи во модерни, етички и одржливи производи.

Како што проектот YouCanBe се приближува кон својот крај, неколку европски настани се на хоризонтот. Останете во тек, следете го развојот на проектот и очекувајте дополнителни можности да се вклучите во оваа иницијатива.

Проектот „You Can Be“ се спроведува од Фондацијата Apprentis d’Auteuil-France (координатор), Vilniaus Kolegija-Литванија, Asociatia Scoala De Valori-Романија, Zaklada Znanje na djelu-Хрватска и Здружение за социјални иновации „АРНО” – С. Македонија. Проектот е финансиран од Еразмус + програмата на Европската Унија